خدوا بالكم

السلام عليكم ورحمة الله

دى قصة حصلت لبنت أعرفها .. الاسبوع اللى فات تقريبا البنت كان مع صاحبتها وأخوها خارجين من المدرسة وهما أعمارهم ما بين 10 و 12 سنة .. وهما مروحين فى شارع عمومى ( خدوا بالكم من عمومى دى) قرب شارع الهرم كدة نزل واحد من تاكسي وقالهم: "انتوا كسبتوا جهاز كمبيوتر وفلوس !! حد منكم يجى يستلم الجايزة"، البنت قالت لأخوها وصاحبتها: "روحوا وانا هاروح استلم الجايزة" .. المهم الراجل ركبها التاكسى واخدها على طريق سفر وهناك سرقوا حلقها ( اللى كانوا فاكرينه دهب) واخدوا منها الفلوس اللى كانت معاها ( 5 جنيه بس والله !! بس نقول ايه فراغة عين ) وخدروها ورموها على الطريق قرب بني سويف ... فضلت مرمية لحد ما جه واحد ابن حلال صحاها وفهمها انها مخطوفة لأن هي يا حرام كل دة كانت معتقدة انها مستنية الجايزة .. الراجل الله يكرمه بيتها عنده و سألها على تليفونات اهلها واتصل بيهم تانى يوم الصبح ووصلها لحد البيت ... استنوا لسة مخلصتش الحكاية .. الراجل طبعا اتبهدل فى الاقسام !!! والله ما أعرف ليه ( انت اكيد فى مصر) .. والبنت بقى طبعا مش قادرة اوصف لكم نفسيتها عاملة ازاى وفوق دة كله الظابط اخدها فى اودة فى القسم بعيد عن أهلها وقال لها كلام يرعبها ( قال يعنى البنت ناقصة علشان يجى واحد زى دة يسمعها كلمتين رعب دة غير التهزيء اللى خدته أمها على إنها أهملت !!! أهملت فين بس دة المدرسة جنب البيت ... والله ما أنا عارفة جرى إيه فى البلد .. عموما كان لازم احكى لكم .. خدوا بالكم من أولادكم
اللهم بلغت اللهم فأشهد والسلام ختام