العيش والعيشة واللى عايشنها

تحدثت بنت مصرية فى البوست الأخير بتاعها عن ان الدقيق غلى والمكرونة كمان غليت مرة واحدة وفجأة، بس الحكاية مش فجأة، أساسا القيمة الشرائية للجنيه بتقل كل شوية، دة طبعا بغض النظر عن ان المصري اساسا مبقاش له قيمة على المستوى المحلى والعالمي، بس يعنى فعلا الجنيه مش بيجيب حاجة، وبعدين دى دخلة رمضان كل سنة وانتم طيبين خلى الناس تتبسط

زمان انا فاكرة وأنا فى ابتدائي كنت باجيب كيس الشبسى بـ 15 قرش وازازة البيسبسي بـ 30 قرش، دلوقتى كل حاجة كجودة بتقل والسعر بيزيد، ودة لأسباب اقتصادية نهبية مهلبية فى الملوخية فى ظل الفكر الجديد للحكومة اللى هو الحق لم فلوسك ليجي يوم ويطردوك زى فاروق تبقى عامل حسابك أوامسك قوت الناس فى ايدك وامسكهم من رقابيهم كمان لو حبيت وجوعهم يمشوا وراك كما الكلاب ويدوروا على قوت يومهم ومالهمش دعوة بالسياسة ولا مين قعد على الكرسي ولا مين ققام واذا كان الكرسي تيفال ولا ألومينيوم من مصانح 6 أكتوبر واللى بيقعد عليه بيلزق لغاية لما يشيط، وللأسف دة حاصل فعلا الشعب كله تقريبا - بأقول تقريبا بقى سلبي، رب الأسرة بدل ما يتظلم ولا يشتكى ولا يصرخ ويقول يا ولاد الحرامية مرتبى 145 اعمل بيهم ايه ولا ايه، بيدور على شغل تانى بعد الظهر أو بالليل وأعرف ناس كمان بتشتغل 3 شغلانات فى اليوم .. أه وربنا 3 شغلانات وكمان يشغل ولاده ويسرحهم فى الاشارات بأعلام الأهلى علشان العالم اللى أهليها مش لاقية تاكل برده بيجوعوا نفسهم ويطحنوا أهاليهم علشان يشتروا كارت شحن أوتذكرة ماتش الأهلى من السوق السودا او برنيطة صيني من بتاعة الأرجوزات يروحوا بيها الماتش - أمال هايشجعوا براسهم كدة من غير برنيطة؟ الطبقة المتوسطة بقى المطحونة اللى قربت تندثر وقريبا هنلاقى لها حفريات ولادها بيشتغلوا من وهما فى الجامعة علشان يصرفوا على نفسهم ويشيلوا عن أهاليهم شوية دة طبعا بالنوسبة للعيال اللى عندها دم يعنى او اللى بيلاقى شغل أصلا

أنا أمى على درجة مدير عام .. والله مرتبى اكبر من مرتبها انا اللى لسة عيلة خبرتى العملية كلها 3 سنين .. انها حكومة السيايات والمسايسات وومفيش خد بس فيه هات وهات وهات وبيع يا عم بيع خلي البلد تضيع، ويمكن بعد كدة والله أعلم تلاقى الشعب بيؤيد اننا نبقى ولاية أمريكية رقم معرفش كام وخمسين ونقبض بالدولار وتبقى حياتنا فل فل ، بس للأسف حتى الأقتراح دة ميلزمش أمريكا لأنها مش محتاجة تضمنا كولاية ودة لأن حكومة مصر أساسا أعلنت الولاية من زمان ( بقت ولية مكسورة الجناح يعنى) ومطاطية راسها لأمريكا ولكل من هب ودب ولا حتى مدبش وبنسمع الكلام وحلوين، يصرفوا علينا ليه بقى وينضفونا كفاية علينا الملاليم الى بناخدها معونة، والناس غلابة والله بتاكل العيش ابو شلن اللى نص رمل وزلط وتغنى على دة العونا وعلى دة العونا

واللى بعترض مبياكلش .. أه والله

الراجل بتاع الفرن اللى جنبنا غلى القٌَرص اللى بيبيعها بقيت بـ 35 بدل ربع جنيه واحد اعترض قام قاله يا عم الدقيق غلي والله، ويرد المشترى يقول وانا مالى .. الفران قاله خلاص من بكرة هتلاقيها بربع جنيه تانى .. بس هانصغرها بقى

وفعلا بعدها عديت عليه لقيت كل حاجة عنده كشت للنص والكيزر بقى اسبرين والفينو بقى قلم رصاص

دقيق ايه ومكرونة ايه اللى بتسألوا عليهم دول

كلوا بيتزا أحسن لكم

يمكن لما نقلب أكل ايطالى الحال المايل يتعدل

وسمعنى سلام .. القمح الليلة الليلة الليلة

ليلة عيده

يارب وحياتك حبيبك النبي لمصر تعيده